Saç əkimi Bakıda: FUE və DHI üsulları

Saç əkimi niyə uzunmüddətli nəticə verir?

Kişilərdə ən çox rast gəlinən saç tökülməsi androgenetik alopesiyadır. Burada iki amil rol oynayır: kişi cinsi hormonları (androgenlər) və irsiyyət. Bu hormonların təsiri ilə saçlar əsasən alın və təpə nahiyəsində tökülür.

Dr. Vaqif Abdullayevin izah etdiyi kimi, ənsə və gicgah nahiyəsindəki saç kökləri bu hormonlara həssas deyil, buna görə orada saç tökülmür. Saç əkimi zamanı saç kökləri məhz bu nahiyədən götürülür. Buna görə köçürülən saçlar yeni yerində də uzunmüddətli qalır.

FUE və DHI üsulları arasında fərq nədir?

Hansı üsulun seçiləcəyi müayinədən sonra, xəstənin saç quruluşuna, saç tökülməsinin həcminə və donor nahiyəsinin imkanlarına görə müəyyən edilir.

Saç əkimi kimlər üçün uyğundur?

Saç əkimi ən çox androgenetik alopesiya zamanı aparılır. Dr. Vaqif Abdullayevin paylaşdığı məlumata görə, 18–60 yaş arası sağlam insanlar saç əkimi üçün müraciət edə bilər. Saç əkimi aşağıdakı hallarda da nəzərdən keçirilir:

• travma və ya yanıq izləri səbəbindən saçsız qalan sahələr;
• bəzi çapıqlı alopesiya halları (məsələn, travmadan sonra baş dərisində yaranmış çapıq nahiyəsi);
• əvvəlki uğursuz saç əkiminin nəticələrinin düzəldilməsi;
• uğursuz saç simulyasiyasından sonra saçın bərpası;
• qaş və saqqal nahiyəsində tüklərin bərpası.

Qərar yalnız müayinədən sonra verilir. Qadınlarda saç tökülməsi davam edirsə, ilk addım onun səbəbini araşdırmaqdır.

Kimlərə saç əkimi tövsiyə olunmur?

Aşağıdakı hallarda saç əkimi tövsiyə edilmir və ya əvvəlcədən ətraflı qiymətləndirmə tələb olunur:

• 18 yaşdan kiçik şəxslər — bu yaşda saç tökülməsi prosesi hələ tam sabitləşmir.
• Kifayət qədər donor saçı olmayanlar — donor sahə zəifdirsə və ya başda saç kökü qalmayıbsa, əməliyyat effektiv olmaya bilər.
• Aktiv infeksiyası olanlar — o cümlədən baş dərisinin infeksiyaları əvvəlcə müalicə olunmalıdır.
• Qanın laxtalanma pozğunluğu olanlar.
• Xroniki xəstəliyi olanlar — şəkərli diabet, ürək-damar xəstəlikləri, yüksək qan təzyiqi olan şəxslər əvvəlcədən həkimlə məsləhətləşməlidir.
• Baş dərisi xəstəlikləri olanlar — psoriaz, seboreik dermatit kimi xəstəliklər əvvəlcə müalicə edilməlidir.
• Keloid çapıq meyli və ya anesteziya preparatlarına allergiyası olanlar.
• Nəticədən real olmayan gözləntiləri olanlar.
• Saç tökülməsi aktiv davam edənlər — əkilən saçların ətrafındakı öz saçlar zamanla tökülərsə, qeyri-bərabər görüntü yarana bilər. Belə hallarda əvvəlcə müalicə məsələsi qiymətləndirilir.

Ətraflı: Kimlərə saç əkimi tövsiyə olunmur?

Saç əkimindən əvvəl hansı müayinələr lazımdır?

1. İlkin onlayn qiymətləndirmə. Saç və donor nahiyənin şəkillərini WhatsApp ilə göndərməklə ilkin rəy və təxmini graft sayı öyrənilə bilər.
2. Əyani müayinə və trixoskopiya. Saçlar və baş dərisi xüsusi optik cihazla müayinə olunur. Baş dərisində hər hansı dəri xəstəliyi varsa, saç əkimindən əvvəl müalicə edilir.
3. Check-up. Qan analizləri (ümumi analiz, laxtalanma göstəriciləri, infeksiyalar) və EKQ.
4. Hazırlıq qaydaları. Saç əkimindən əvvəl və sonra spirtli içkilər və qanı durulaşdıran dərmanlar (məsələn, aspirin) qadağandır. Siqaret, qəlyan və digər tütün məhsulları tövsiyə olunmur.

Əməliyyat günü necə keçir?

• Planlama. Saç qırxılmazdan əvvəl donor və əkim nahiyəsinin sərhədləri, saç xətti marker ilə çəkilir. Bu, saç sərhədlərinin dəqiq qalması üçün vacibdir.
• Yerli anesteziya. Anesteziya yalnız işlənən nahiyəyə tətbiq olunur, xəstə oyaq qalır. Anesteziya üçün iynəsiz injektordan da istifadə oluna bilər.
• Saç köklərinin götürülməsi. Saç kökləri mikromotor cihazı ilə tək-tək götürülür. Bu, əməliyyatın ən həssas mərhələsidir: saç kökü götürülərkən zədələnərsə, əkilən saç çıxmaya bilər.
• Graftların hazırlanması. Götürülən graftlar komanda üzvləri tərəfindən diqqətlə seçilir və sayılır. Bir graftda bir, iki və ya üç saç teli ola bilər.
• Əkim. Əkiləcək nahiyədə kanallar açılır və graftlar yerləşdirilir.

Bir seansda neçə graft əkilir?

Graft sayı donor nahiyənin imkanlarına və saç tökülmüş sahənin ölçüsünə görə fərdi müəyyən edilir. Dr. Vaqif Abdullayevin Media.az-a müsahibəsində bildirdiyinə görə, bir seansda tövsiyə olunan graft sayı təxminən 3500–3600-dür. Daha çox graft tələb olunarsa, saç əkimi iki mərhələdə aparılır.

İki mərhələli saç əkimi

Saç tökülmüş sahə çox genişdirsə, birinci mərhələdə həkimin planlaşdırdığı nahiyəyə saç əkilir. İkinci mərhələ, adətən, təxminən bir il sonra, xəstə istədikdə aparılır və çox vaxt təpə nahiyəsinin sıxlığını artırmağa yönəlir. Hər mərhələ ayrıca əməliyyatdır. Mərhələlər arasındakı fasilə toxumaların bərpası üçün lazımdır.

Saç əkimindən sonra bərpa necə keçir?

Bərpa dövründə sauna, idman və birbaşa günəşdən uzaq durmaq tövsiyə olunur. Bu məhdudiyyətlərin dəqiq müddətini həkim fərdi olaraq bildirir. Ən vacib dövr ilk 10 gündür: qulluq tövsiyələrinə tam əməl etmək lazımdır.

Ətraflı: Saç əkimindən sonra qulluq qaydaları

Qadınlarda saç əkimi

Saç əkimi yalnız kişilərə deyil, qadınlara da aparılır. Qadınlarda saç tökülməsi ciddi davam edirsə, ilk addım onun səbəbini araşdırmaq və müalicəni bu səbəbə uyğun seçməkdir. Dr. Vaqif Abdullayevin qeyd etdiyi kimi, bəzi hallarda qadınlarda saçın bərpası üçün yeganə çıxış yolu saç əkimi olur.

Qadınlarda saç əkimi seçilmiş hallarda saçları qırxmadan aparılır. Bu, gündəlik görünüşü dəyişmədən prosedurdan keçməyə imkan verir.

Saçları qırxmadan saç əkimi

Saçları qırxmadan saç əkimi zamanı başın böyük hissəsi qırxılmır, yalnız kiçik nahiyələrdə lokal kəsim aparılır. Dr. Vaqif Abdullayev bu üsulu əsasən aşağıdakı hallarda tətbiq edir:

• əkim sahəsi kiçik olduqda;
• saç yalnız alın nahiyəsinə əkildikdə;
• qadınlarda.

Bu üsul saçlarını qırxdırmaq istəməyən və iş həyatına görə görünüşünün dəyişməsini istəməyən şəxslər üçün uyğun seçim ola bilər. Uyğunluq müayinə zamanı müəyyən edilir.

Əkilən saçlar yenidən tökülürmü?

Əkilən saçlar hormonlara həssas olmayan donor nahiyədən götürüldüyü üçün uzunmüddətli qalır. İlk 3 ayda baş verən keçici tökülmədən sonra saçlar yenidən çıxır. Dr. Vaqif Abdullayevin Media.az-a müsahibəsində bildirdiyinə görə, köçürülən saçların təxminən 90%-i tutur və qalıcı olur.

Nəzərə almaq lazımdır ki, əkilməyən nahiyələrdəki öz saçlarda tökülmə davam edə bilər. Belə hallarda həkim tökülmənin qarşısını almaq üçün müalicə tövsiyə edə bilər.

Saç əkiminin qiyməti nədən asılıdır?

Qiymət hər xəstə üçün fərqli ola bilər və aşağıdakı amillərdən asılıdır:

• saçı tökülmüş sahənin həcmi;
• alopesiyanın (saç tökülməsinin) növü;
• yanaşı hansısa xəstəliyin olması.

Dəqiq qiymət əyani müayinədən sonra bildirilir. İlkin məlumat üçün şəkillərinizi WhatsApp ilə göndərə bilərsiniz.

Saç əkimi üçün klinika seçərkən nəyə diqqət etməli?

Saç əkimi estetik prosedur deyil, tibbi əməliyyatdır. Yalnız qiymətə görə seçim etmək sterilizasiya qaydalarına əməl olunmaması, prosedurun tibbi təhsili olmayan şəxslər tərəfindən aparılması, donor nahiyəsinin geri dönməz zədələnməsi və əməliyyatdan sonra nəzarətin olmaması kimi risklər yarada bilər. Ətraflı